Kas pammigbig iti napateg a kontribusion dagiti contract of service ken job order worker, pinermaan ni Presidente Ferdinand Marcos Jr ti Administrative Order No 39 a mangted iti year-end gratuity pay nga agingga P7,000 para kadagiti kwalipikado a mangmangged iti gobierno.
Ti nayon a bayad ket para kadagiti empleado iti salinong ti contract of service ken job order a nagserbi iti pakabuklan wenno napagtipon a saan a bumaba iti uppat a bulan agingga idi December 15 ken epektibo ti kontratada iti isu met laeng a petsa.
Dagiti mangmangged iti tallo a bulan ngem nababbaba iti uppat a bulan ti serbisioda ket makaawat met laeng iti gratuity pay a saan a nasursurok iti P6,000.
Dagiti empleado met nga adda dua a bulan ngem nababbaba ngem iti tallo a bulan ket makaawat iti gratuity pay a saan a nasursurok iti P5,000 idinto a dagiti adda nababbaba ngem iti dua a bulan a nagserbida ket makaawat iti bayad a saan a nasursurok ngem iti P4,000.
Sakupna dagiti mangmangged kadagiti national government agencies, state universities and colleges, government-owned or -controlled corporations ken local water districts.
