Inaprubaran ni Presidente Ferdinand Marcos Jr ti P5,000 nga insentibo kadagiti empleado ti gobierno.
Maibasar iti immuna a circular nga inruar ti Department of Budget and Management, ti insentibo ket maited kadagiti empleado ti gobierno kas gungona iti nagun-odda nga ‘agency and financial performance targets’ ken tapno agbalin a motibasyon kadagiti empleado nga aggagaget iti trabaho.
Segun ken ni Palace Press Officer Claire Castro, ti addang ti presidente ket mangipakita iti agtultuloy a suporta ti Marcos administration iti panangpabileg iti kinaproduktibo ken moral dagiti empleado ti gobierno.
Kunana a mamati ti presidente a nasken laeng a maikkan importansia dagiti kameng ti gobierno nga awan sarday nga agserserbi ken katulongan tapno maipaay ti kasapulan dagiti umili.
