Inallukoy ni Presidente Ferdinand Marcos Jr dagiti umili nga aramaten a pannarabay ken pigsa ti nagbalin a biag ti nailian a bannuar a ni Gat Jose Rizal, kangrunaan ti panagayat iti pagilian, respeto para iti kinapudno, panangkalikagum iti patas a reporma ken panangpasingked no ania ti husto.
Ti mensahe ni Marcos ket kagiddan ti pananglagip ita nga aldaw iti maika-129 nga anibersaryo ti pannakatay ni Rizal.
Segun ken ni Marcos, kiddawen dagiti umili ita ti integridad ken kinapudno kadagiti lider ti pagilian, iti baet ti nabara a patangan iti imbestigasion kadagiti anomalya a nakairamanan dagiti dadduma nga opisial ti gobierno.
Indaulwan ti presidente ti commemoration ti pannakatay ni Rizal idiay Rizal Park babaen iti panangipangato iti bandera ken panangisagut iti sabong iti monumentona.
