Inallukoy ni Presidente Ferdinand Marcos Jr. dagiti lider dagiti pagilian a karaman iti United Nations nga agkaykaysa a manglaban kadagiti amin a klase ti kinaranggas kontra kadagiti babbai.
Dayta ket kagiddan ti panagsarita ti Presidente iti 70th session ti Commission on the Status of Women idiay New York, USA.
Segun iti Presidente, adu a babbai uti kagimungan ti sumangsango kadagiti adu a lapped isu a limitado ti gundaway kadakuada ken adu ti makarikrikna iti diskriminasion ken kinaranggas.
Adu pay a babbai ti maipapaidaman iti edukasion nga isu ti mangidalan koma iti napimpintas a masakbayan isu a napateg ti akem ti komision a maital-o dagiti babbai.
Kunana a kasapulan ti panagkaykaysa tapno sangwen ti kinaranggas kontra kadagiti babbai ta ti kinaranggas ti mangdadael iti dignidad, mangpakapsut iti komunidad ken mangdad-dadael iti pundasion ti hustisia.
