Inwaragawag ni Presidente Ferdinand Marcos Jr. ti pannakaipatungpal ti four-day work week kadagiti dadduma nga opisina iti ehekutibo mangrugi inton Lunes, March 9.
Segun ken ni Marcos, addang daytoy ti gobierno tapno makainut iti gastos iti koriente gapu iti agtultuloy a panagpangina ti presio ti produkto-petrolyo nga epekto ti kumarkaro a riribuk iti Middle East.
Iti salinong ti uppat nga aldaw a serrek, manamnama a mayatiddug ti oras ti trabaho iti kada aldaw tapno makompleto latta ti kasapulan nga oras ti serbisio iti gobierno.
Saan a karaman ditoy dagiti ahensia a mangipapaay iti emergency ken kangrunaan a serbisio.
Nabilin dagiti opisina ti gobierno nga agkissay iti agingga 20 percent iti konsumo ti koriente ken petrolyo.
Maisardeng pay laeng dagiti saan a kasapulan a biahe ken aktibidad kas ti study hours, team-building, ken dagiti taripnong a saan a mabalin nga aramiden iti online.
