Impasigurado ni Presidente Ferdinand Marcos Jr a normal latta ti biag dagiti Pilipino iti baet ti panagpangina ti presio ti langis iti naglabas a lawas gapu iti riribuk iti Middle East.
Segun ken ni Marcos, kitkitaenen ti gobierno ti dadduma pay nga addang tapno maited ti subsidiya kadagiti sektor nga apektado iti krisis, kagiddan ti panangibagana a saanna kayat nga agdanag ti publiko.
Immunan a nangisayangkat iti nationwide transport strike, aldaw ti Huebes ti transport group a Piston ken progressive alliance a Bagong Alyansang Makabayan kas protesta iti agtultuloy a panagpangina ti presio ti langis.
Nagtitipon dagiti nagprotesta iti Welcome Rotonda idiay Quezon City para iti press conference sakbay a narugyan ti kilos-protesta, a manamnama a mangapektar iti kangrunaan a ruta iti pagilian.
