Imbilinen ni Presidente Ferdinand Marcos Jr. iti maysa nga special session ti Kongreso inton Mierkoles, Hunyo 17 tapno pagpatangan dagiti prayoridad a gakat ken dagiti naitantan a kumpirmasion ti Commission on Appointments.
Iti salinong ti Proclamation No 1318, inaramat ni Marcos ti turay nga inted kenkuana ti Konstitusion tapno paayaban ti Senado ken Kamara bayat a naka-break ti regular session.
Karaman kadagiti gakat a kayat nga ipangruna ti administrasion ti pannakabukel ti National Center for Geriatric Health, dagiti amyenda iti Government Assistance to Students and Teachers in Private Education (GASTPE) Act, Assistance to Individuals in Crisis Situations (AICS) Act, ken Universal Access to Quality Tertiary Education Act.
Gagem ti proklamasion a papigsaen ti social protection programs ken mapasayaat ti kasasaad dagiti umili.
