Binilin ni Presidente Ferdinand Marcos Jr dagiti gobernador kadagiti lugar nga inapektaran ti bagyo Basyang a pagbalinen a simple ti proseso ken siguradoen a napaspas a makasangpet ti tulong kadagiti pamilia nga agkasapulan.
Kinataripnong ni Marcos dagiti gobernadora kalpasan a dimmar-ay iti MOA signing ti Department of Education tapno agbalin a partner iti pannakaipatakder dagiti school building.
Segun iti Presidential Communications Office, impasigurado ti presidente kadagiti gobernador ti nasapsapa a pannakairuar ti pondo para iti panagsagana sakbay pay a dumuprak ti didigra ken ti pannakapadaras ti proseso tapno maited a dagus ti tulong.
Para kadagiti mannalon a naapektaran, dagus a mangted ti gobierno iti bin-i tapno makairugida nga agmula.
Natratar pay iti taripnong ti presidente ti pannakapapigsa ti clearing operation kadagiti karayan tapno maksayan ti peggad iti layus.
