Pinasingkedan ni Presidente Ferdinand Marcos Jr ti agtultuloy a panangpapigsa kadagiti benepisio, insentibo ken suporta para kadagiti mangisursuro kagiddan ti panangrambak iti National Teachers’ Day idiay Araneta Coliseum, Quezon City.
Karaman ditoy ti World Teachers’ Day Incentive Benefit ken Performance-Based Bonus para iti 2024, nga imbilinna a mapaalisto ti proseso ti pannakaipaayna.
Innayon ti presidente a nasurok 82,000 a mangisursuro ken school heads ti nai-promote iti salinong ti Expanded Career Progression System, kagiddan dagiti addang tapno maksayan ti classroom observations ken administrative workload.
Impaganetget ni Marcos nga agtalinaed a prayoridad ti administrasion ti edukasion, pagsayaatan dagiti mangisursuro, suporta iti mental health, ken kinatalged dagiti agad-adal.
