Binigbig ni Presidente Ferdinand Marcos Jr ti kinabanuar dagiti Pilipino a suldado, kangrunan dagiti nangisakit iti Bataan idi World War II.
Iti mensahena para iti Araw ng Kagitingan, kinuna ti presidente a daytoy nga aldaw ket saan laeng a para kadagiti limmaban para iti Bataan no di ket kadagiti amin a Pilipino a nangipakita iti tured ken panagayatda idi panawen ti rinnupak.
Ti istoryada ket agserserbi latta nga inspirasyon kadagiti Pilipino tapno itultuloyda ti narugianda.
Segun iti presidente, ti Pilipinas ti pagtaengan dagiti pudno a bannuar a natured a nangisakripisyo iti bagida para kadagiti umili.
Kunana a ti kinabannuar ket saan laeng a marukod iti pigsa ken tibker iti pakinakem iti panawen ti karit no di ket uray kadagiti simple a panagaramid laeng iti kinasayaat ken panangisakit ti mangitunda iti panagbalbaliw iti kagimungan.
