Bambantayan ni Presidente Ferdinand Marcos Jr ti posible nga epekto iti remittance dagiti Overseas Filipino Worker ti mapaspasamak a rinnupak iti Middle East.
Iti maysa a press conference, inyunay-unay ni Presidente Marcos a malaksid iti seguridad ken diplomatiko nga aspeto, maigiddan pay ti panangsapul iti wagas tapno mapagtalinaed nga agtultuloy ti taray ti dolyar a mangsupsuporta iti minilion a Pilipino.
Impalagipna a ti Gulf Region ket isu ti ayan ti maysa kadagiti kadakkelan a konsentrasyon dagiti mangmangged a Pilipino, isu a napateg ti rehion kas kangrunaan a pagtataudan ti remittances.
Innayon ti presidente a narigat a rukoden ita ti pakabuklan nga epekto.
Mapatta-patta a 80 agingga 95 porsiento dagiti OFW iti rehion ti agtultuloy a sumsumrek iti trabaho, a ti dadduma ket nag-shift iti work-from-home arrangement no mabalbalin.
