Binanatan ti Malakanyang ni Vice President Sara Duterte gapu iti panangbabalawna ken ni Presidente Ferdinand Marcos Jr iti panagikkat ni Rep. Martin Romualdez kas House Speaker ken ti isyu ti korapsion iti national budget.
Kasaruno daytoy ti panangibaga ni Duterte a saan a nasken a palubosan dagiti agpampanday-linteg a makapanaw iti pagilian bayat a maim-imbestigaran, ken ti panagikkatna tapno malisyan ti pannakainaigna iti isyu.
Segun ken ni Palace Press Officer Claire Castro, awan turay ni Marcos a lapdan dagiti kongresista ken senador iti panagbiahe gapu ta nalawag ti ‘separation of powers’.
Binabalaw ti Malakanyang dagiti biahe ni VP Sara a naggastos iti P7.4 milion manipud iti pondo ti gobierno para iti seguridadna, idinto nga agtultuloy dagiti isyu iti anomalya ken pangta ti impeachment kontra kenkuana.
