Simmuko ti lider ti Kingdom of Jesus Christ (KOJC) a ni Apollo Quiboloy kalpasan a nangted ti ultimatum ti Philippine National Police tapno isukona ti bagina iti uneg ti duapulo ket uppat nga oras ta no saan ket mapilitan dagiti otoridad a serreken ti maysa a building a saanda a mabalin a serreken idiay KOJC compound, Davao City.
Segun kenni PNP spokesperson Police Colonel Jean Fajardo, nangrugi ti negosasion iti agarup ala-una y medya iti malem idi kalman.
Insuko met ni Quiboloy ti bagina iti Intelligence Service ti Armed Forces of the Philippines (ISAFP), ken nakemmeg iti 5:30 pm, kaduana dagiti kakunsabos na a da Jackielyn Roy, Ingrid Canada, Crisente Canada, ken Sylvia Cemañes.
Dimmalan metten ti booking procedure dagiti akusado idiay Camp Crame, Quezon City, a daytoy a proseso ket pakairaman ti fingerprinting, mug shots, ken blood pressure checks ta dagiti dadduma kadakuada ket addaan iti nangato a blood pressure kas basar iti medical examination da. Kabayatanna, madaman a maprosproseso ti custodial arrangements da, ngem possible nga agsisinada ti units.
