VIGAN CITY – Natalgeden iti kasasaad dagiti pasaheros a nadangran ti napasamak nga aksidente idiay San Quintin, Tangadan a nakairamanan ti Bus nga adda tatakna a Venichi Trans.
Iti pannaki-uman ti Bombo Radyo Vigan ken ni Plt. Col Daniel Pel-ey, Chief ti PCADU Abra Police Provincial Office, nabigbig ti driver a ni Romeo Paz Pico, agtawen iti innem a pulo ket lima, residente ti Zone 7, Bangued Abra.
Segun ken ni Plt. Col Pel-ey, idi nakadanunda ti nakapasamakan ti aksidente ket saanen a kimpet iti preno ti bus a rason ti pannaka-aksidente da.
Gapu ti napasamak, nagsagrap dagiti walo a pasaheros na iti dunor, ken naipanda ti Abra Provincial Hospital para iti pannakatamingda.
Sungbatan met ti driver iti nagastos dagiti nadundunor a biktima.
Kabayatanna, adda pay laeng iti bus ti nakapasamakan iti aksidente ken iremremodyan ti driver no kasanoda a maikkat ti bus iti dalan.
Panawagan ni Plt. Col Pel-ey kadagiti driver ti bus a siguraduenda a nasalun-at da ken saanen nga agmaneho no nakainom iti arak ta adu a biag iti tao nga iggemda.
