VIGAN CITY – Nakanselar ti amin a biahe dagiti barko idiay Port of Real, Quezon gapu ti pangta ti bagyo Paeng isu a na-stranded dagiti kaaduanna a pasahero.
Iti pannaki-uman ti Bombo Radyo Vigan ken ni Eduardo Estoche, Crew ti MV Syvel, ita a naibayog iti signal no 1 ti Polillo Islands ket naisardengen ti operasyon dagiti barko ngem no gale warning ket mapalubosan latta nga agbiahe dagiti ruru vessel.
Nupay kasta, adda dagiti stranded a pasahero a nakalugan iti barko ken adda pay dagiti adda idiay pantalan nga agur-uray a sumayaat iti paniempo.
Segun ken ni Bobet Escarezes, maysa a stranded a pasahero a taga-Polillo Islands, sipud idi rabii ket nagtaltalinaed pay laeng iti barko ta alas tres iti parbangon idi limmuganda ngem saanda a napakpakadaan ti pannakaibayog ti signal no 1 iti lugarda gapu ti bagyo.
Iti agdama, iyur-urayda iti pammilin manipud iti Coast Guard ken namnamaenda a kumapsuten ti bagyo tapno makatuloydan nga agbiahe.
Innayonna a maysa kadagiti parikutda nga stranded a pasahero no ti badyetda ket umanay laeng a pagpleteda ngem nupay kasta, kinunana nga adda met dagiti taraon nga ipaay kadakuada ti Local Government Unit.
