Impaganetget ni Pres. Ferdinand Marcos Jr. ti kinapateg ti aktibo a pannakipaset iti publiko kadagiti social issue kas paset iti kalikagumda a magun-od ti maysa a “Bagong Pilipinas.”
Nagyaman ni Marcos kadagiti Pilipino nga agipatpatulod iti surat ken mensahe kalpasan iti maika-lima nga State of the Nation Address-na idi July 27.
Inallukoyna iti publiko nga agtultuloy a makipaset kadagiti patangan ken addang nga adda pakainaigan iti panagdur-as iti pagilian.
Kinuna ti presidente a rumbeng a kitaen ti SONA kas agtultuloy a panaggaggaget iti gobierno a tignayan dagiti parikot iti pagilian ken matungpal dagiti arapaap dagiti Pilipino.
Karaman kadagiti naawatna a mensahe dagiti surat manipod kadagiti agtutubo a naglaon kadagiti arungaingda maipanggep iti salun-at, bisin, ken dadduma pay a parikot a sangsangwen iti pamilia ken komunidad.
Imbingay ni Marcos ti surat dagiti miembro ti Youth for Health Coalition, pakairamanan ti maysa nga agtutubo a Pilipino nga adda amana a dimmalan ti dialysis bayat a makapaspasar iti parikot ti taraon iti pamiliana.
Nadakamat ti presidente ti Walang Gutom Program, a mangmangted ti tulong kadagiti Pilipino nga awan ti umdas a taraon ken saan a sigurado no makakaan iti mamin-tallo a daras iti kada aldaw.
