Immapela ni Fr. Robert Somera iti Our Lady of Hope Parish Church Caoayan kadagiti agkakabsat a Singson a maisardengen ti mapaspasamak a dredging iti nasao nga ili.
Kangrunaan a dakdakamaten ti padi da Governor Jerry Singson, Chavit Singson, ken ni Mayor Germie Guolart.
Iti pannaki-uman ti Bombo Radyo Vigan ken ni Fr. Somera, anamonganda ti dredging no karayan ti pakaaramidanna, saan ket nga iti kabaybayan agsipud ta awan ti nasayaat nga epektona.
Inlawlawag ti padi a saanna nga iramraman ti isyu ti sand mining ta awan ti iggemna nga ebidensya ta ti kangrunaan a pakaseknanda laeng ket dagiti agindeg, pannakasalaknib ti igid ti kabaybayan ken ti pagtaudan ti taraon wenno panggedan dagiti umili.
Naiplastar ti karatula a ‘No to Dredging’ iti aglawlaw ti simbaan tapno mairiing kadagiti agindeg a tumulong ken saanda a mabuteng a makikaysa a mangkontra iti daytoy nga addang.
