VIGAN CITY – Dead on Arrival ni Analyn Edeleon Imperial, agtawen ti limapulo ket walo, naasawaan nga agnaed idiay Brgy. Mambug, Santiago, Ilocos Sur gapu ti mapapati a panagbekkelna.
Iti pannaki-uman ti Bombo Radyo Vigan ken ni PLt. Godofredo Ribuyaco nga OIC ti Santiago Municipal Police Station, nakita laengen ni Felix Eleccion Edeleon, agtawen ti innem a pulo ti kabsatna a nakabitin babaen ti nasurok kumurang tallo a metro a tali isu nga inarayatna ket timmawag ti Rural Health Unit ket bayat ti panagur-urayda ket impadas ti nurse a karrubada nga i-revive ti biktima.
Naipan pay laeng ti biktima idiay Candon General Hospital, Candon City ngem naipakaammo a natayen babaen ti attending physician-na a ni Dr. Charice Gacutan.
Maibasar ti imbestigasyon nga insayangkat dagiti pannakabagi ti linteg, mapapati a parikot ti pinansial iti nagbekkelan ti biktima ta dua agingga tallo a lawasen a bedridden ti asawana a tricycle driver nga isu ti agsapsapul ken nairana pay nga adda ti anakda iti ospital.
Innayonna nga awan iti aniaman a nakadlaw iti panggep ti biktima nga agpakamatay.
