Mapapati a parikot iti loan wenno utang ti nangkettelan ti bukod a biag ti maysa nga ama iti ili ti Sto. Domingo, Ilocos Sur.
Iti pannaki-uman ti Bombo Radyo Vigan ken ni PCapt. Rodel Ragasa manipod Sto. Domingo Municipal Police Station, ti biktima ket agtawen iti uppat a pulo ket walo, naasawaan, nga agnaed iti nasao nga ili.
Segun ken ni Ragasa, iti alas sais singkwenta iti bigat iti June 19, 2025, nakalukat bassit ti arwangan ti kuarto ti biktima isu a simmirip ti putotna ngem isu metten iti pannakakitana a nakabitin ti amana babaen ti tali a naigalot iti steel window.
Nagpaarayat ti anak kadagiti kabagyanda isu a naipan ti biktima iti Tolentino Clinic and Hospital idiay Barangay San Pablo iti nasao nga ili ngem natay bayat a matamtaming.
Iti napalpalabas nga aldaw ket saan a matagtagari ti biktima ket idi sinaludsod ti nagannakna nu ania iti parikotna ket saanna a naibaga ngem ammoda a napalus iti panangpampanunotna maipanggep iti loanna isu a patienda nga isu ti nangkettalenna ti biagna.
Palagip ni Ragasa kadagiti umili a nu adda parikot ket umasideg laeng kadagiti kameng ti pamilia, kabagyan wenno gagayyem ket ipakaammo kadakuada tapno saan a mapanunot a dangran iti bagi.
VIDEO – PCAPT RODEL RAGASA
