VIGAN CITY – Parikot iti kwarta ken ti nakautangan na iti mapapati a rason nu apay a nagbekkel ni Michael Castillo nga agtawen ti tallo pulo ket lima, naasawaan nga agnaed idiay Barangay Macatcatud, Magsingal idi September 21.
Segun ken ni Police Captain Mark Lagman, hepe ti Magsingal municipal police station, ti asawa ti biktima iti nakaibaga ken ti imbestigador da a ti panagparikot da iti kwarta ken ti utang da a itay kallabes a saan da pay a nabayadan iti patien na a rason nu apay a naginom ken nagpakamatay ti asawa na.
Alas sais iti rabii ti September 21 idi naginom ti biktima kabayatan nga aglutluto ti asawa na ket idi nalpas da a nanganen, pinaturog ti asawa ti biktima iti anak da ket saan a napupuutan ti babai a nairidep na ket idi makariingen, nakita metten ti biktima a nakabitin babaen iti tali a nakaiputipot iti tengnged na.
Nagpaarayat ti asawa ti biktima ket intaray da ti biktima idiay Ilocos Sur District Hospital – Magsingal ngem naideklerar a dead on arrival.
