Naisayangkat ti National Disaster Resilience Month Parade of Capability iti Ilocos Sur kas paset iti kickoff ceremony iti 37th National Disaster Resilience Month ita a bulan ti Hulyo.
Ti tema ita a tawen ket ‘KUMIKILOS’ a ti kayatna a sawen Kayang Umaksyon ng Mamamayan na Isabuhay ang Kahandaan ng bawat Isa para maging Ligtas sa Oras ng Sakuna.
Iti pannaki-uman ti Bombo Radyo Vigan ken ni Provincial Disaster Risk Reduction and Management Officer Rhon Arquelada, nakipaset iti parada dagiti kameng ti Local Government Unit ken Disaster Risk Reduction and Management Council kadagiti probinsia ti rehion.
Gagem ti aktibidad a maipakita ti panagkaykaysa dagiti rescuer ken ti abilidadda no maipanggep iti panagbalin a natalged ken natibker dagiti Pilipino no adda didigra.
Malaksid dayta, ipalagipna pay iti tunggal maysa ti panangpapigsa iti disaster preparedness activities ken disaster response nangruna kadagiti natural and man-made hazards iti rehion.
Nagbalin met a naannayas ti parada babaen ti pannakitinnulong ti Vigan City Police Station ken Vigan Public Safety Office nga agbantay kadagiti ruta ti parada.
