Napadayawan kas Safest School ti Pantay Integrated School iti Siglat Festival 2026.
Iti pannaki-uman ti Bombo Radyo Vigan ken ni Maggie Aytona, school head, nagbalin a tulbek iti pannakagun-odda ti pammadayaw ti koordinasion ken panagtitinnulong dagiti estudiante ken dagiti nagannak.
Paset iti safety measures-da ti panagisuot iti hard hat ti kada estudiante kas proteksionda no bilang adda gingined, ken isursuroda pay kadagiti ubbing no ania ti nasken nga aramidenda no adda didigra.
Adda pay ti DRRM Hub ti pagadalan a pakakitaan dagiti alikamen ken pasilidad a maaramat para iti disaster preparedness, agraman ti search and rescue equipment ken dadduma pay nga improvised nga alikamen.
Dakkel met ti suporta dagiti nagannak ken barangay official, a nagserbi a katulongan ti pagadalan iti panangisagana ken panangsalwad kadagiti agad-adal tunggal adda didigra.
Para iti pagadalan, saan laeng a maysa daytoy nga achievement kadagiti nagannak ken estudiante no di ket balligi ti intero a komunidad.
