Binallaagan ni Vice President Sara Duterte ti amana a ni dati a Presidente Rodrigo Duterte a mabalin a maitulad isuna ken ni Benigno “Ninoy” Aquino Jr. no ipilitna ti agsubli iti pagilian.
Iti gathering dagiti supporters idiay The Hague, Netherlands, kunana a namin-anona a salsaludsoden isuna ti amana no kaano a makaawid, ta kayatna ti agkampanya kas mayor ti Davao City.
Ni Duterte ket agdama a nakaibalud idiay The Hague gapu iti impila ti International Criminal Court a crimes against humanity gapu iti nadara a war on drugs ti administrasyonna.
Kabayatanna, kinontra met daytoy ti Malakanyang ta segun ken ni Palace Press Officer Claire Castro, mismo a ti dati a presidente ti nangiyarig ti bagina ken ni Hitler idi kangitingitan ti kampanya iti iligal a droga.
Impannakkel pay dati a presidente a tallo a mailion ti minassacre ni Hitler, idinto nga adda met tallo milion a drug addict iti pagilian, ken naragsak isuna a mangpapatay kadagitoy.
Innayon ni Castro nga adayo a mayarig ni Duterte ken ni dati a Pres Aquino ta awan ti recordna daytoy iti mass murder, saan a kasla iti dati a presidente nga adu dagiti extrajudicial killings iti administrasyonna.
