VIGAN CITY – Awan ti nadangran iti pannakauram ti pagtaengan ti agassawa a da Edilberto Taysa Pichay, agtawen iti walopulo ket maysa ken ni Erlinda Alipaga Pichay idiay Zone 5, Bantay.
Iti pannaki-uman ti Bombo Radyo Vigan ken ni Pichay, matmaturogda ti asawana iti kalapaw ti sangwanan ti pagtaenganda gapu ti pannakalayusda idi kallabes idin ta riniing ida ti karrubada gapu ta maur-uram ti pagtaenganda.
Kinunana nga idi rimuarda nga agassawa ket dakkelen ti apuy manipud iti salasda.
Natakuatan a naaddaanda laeng ti koriente iti uneg ti tallo nga aldaw kalpasan ti bagyo ket ti modem ti wifi da ti adda a nakasaksak iti salasda.
Nagresponde dagiti kameng ti Bantay Fire Station ken ti Vigan City Fire Station ket nadepdep ti apuy iti alas kuatro kuatro iti parbangon.
Kabayatanna, nasurok kumurang pito gasut a ribo a pisos ti gatad dagiti nauram a sanikua.
Iti agdama, manarimaan ti panangduktal ti Bureau of Fire Protection no ania ti nagtaudan ti uram.
