Pannakatukbob ti motorsiklo iti SUV iti ili ti San Vicente, maysa ti nadunor

VIGAN CITY – Maysa ti nadunor iti aksidente a nakairamanan ti maysa a motorsiklo ken SUV idiay Barangay Bayubay Sur, San Vicente.

Nabigbig ti nagmaneho iti SUV a ni Francisco Navarro, agtawen iti uppat a pulo ket uppat, seaman, taga-Barangay Cabaroan, Sta. Catalina ken adda dagiti pasaherona a da Leryl Navarro, Laina Navarro ken ni Hannah Navarro.

Kabayatanna, ti met nagmaneho iti motorsiklo ket ni Harold Bautista, agtawen iti tallopulo ket maysa, taga-Barangay Bulag, Bantay.

Agpapalaud a direksyon ti dua a lugan idin ta natukbob ti motorsiklo ti likudan a paset ti SUV.

Gapu dayta, naitinnag ti drayber ti motorsiklo iti kalsada ket nadunor ti akin-kannigid a kidayna idinto a ti drayber ti SUV ken dagiti pasaherona ket saan a naan-ano.