VIGAN CITY – Nagpanawagan ni Barangay Captain Ernie Molina iti San Pedro, Narvacan, Ilocos Sur iti national government a matignayan ti kanayon a pannakateppang ti kalsada iti barangayda a kumamang iti ili tunggal tiempo ti bagyo.
Iti pannaki-uman ti Bombo Radyo Vigan ken ni Molina, saan a kabaelan ti municipal ken provincial government a pondoan daytoy iti bukodda isu a kiddawenna ti tulong manipud iti national government.
Kunana a daytoy ti tinawen a mangparparigat kadakuada ta saanen a makapaili dagiti agindeg no saanda a magmagna ta awan met ti alternatibo a ruta a mabalinda a pagnaan.
Iti agdama, agtultuloy ti panangibakwitda kadagiti agindeg nga adda iti asideg iti karayan para iti kinatalgedda.
Malaksid dayta, kiniddaw ni Barangay Captain Molina iti provincial government ti pannakaipaay iti relief goods kadagiti kalugaranna nangruna ita a marigatanda nga agpaili a mapan gumatang iti kasapulanda.
