VIGAN CITY – Saan pay laeng a pakadanagan idiay France iti kaso iti coronavirus disease kalpasan a nakumpirmaran iti pannakatay ti maysa a pasyente a naapektaran iti nasao a sakit.
Ti pannaki-uman ti Bombo Radyo Vigan kenni Bombo International Correspondent Ruby Amay, maysa nga Overseas Filipino Worker idiay France, uray nu addan dagiti kumpirmado a kaso ti COVID- 19 iti lugar nga ayan da, saan da pay laeng unay nga agar-aramat ti face mask iti laksid nga adda payen ti pasyente nga agtawen ti walo pulo a Chinese national a naapektaran ti COVID- 19 a pimmusay.
Innayon ni Amay a dagiti tattao a nakaface mask idiay France ket dagiti naggapu iti ospital.
Napaliiw na a normal latta iti sitwasyon nu aglugan da iti tren ken normal iti panagpipinnulapol dagiti tattao ngem adda dagiti sumagmamano a Pilipino a liklikan da dagiti Chinese nationals a makasinnabet wennu makita da ta maamak da a maakaran iti nasao a sakit ngem kadagiti French nationals arigna awan laeng kadakuada nu Chinese national iti makapinnulapol da.
Ti agdama, sangapulo ket dua iti kumpirmado a naapektaran iti nasao a sakit idiay France idinto a maysa pay laeng iti pimmusay.
