Binabalaw ni Atty. Estelita ‘Tillie’ Cordero ti nagbalin nga addang ni Mayor Pablito Sanidad a mangrakrak iti daan a Public Market iti ili ti Narvacan nga awan ti naar-aramid a konsultasyon kadagiti agtagilako.
Iti pannaki-uman ti Bombo Radyo Vigan ken ni Atty. Cordero, awan ti nagbalin a sungbat ti kampo ti mayor iti apelada iti korte, no di ket dagus nga imbilinna ti pannakarakrak ti daan a tiendaan babaen iti panangaramatna iti ISECO ken kapulisan a nangpapanaw kadagiti agtagilako ken panangibaga kadakuada a mayakarda idiay Narvacan Mall.
Ti pannakarakrak ti daan a tiendaan a napondoan iti P15-M babaen iti World Bank ket gapu iti kalikagum ti agdama nga administrasyon a masukatan iti parke nga aggatad iti P4.8 million.
Ngem nupay kasta, ikalkalintegan ni Atty. Cordero nga ad-adda a kasapulan ti tiendaan nga isu ti paggatangan dagiti umili kadagiti kasapulanda iti inaldaw, saan ket a masapulda pay laeng ti agplete a mapan iti naad-adayo.
Kunana nga awanen ti hustisia kadagiti agtagilako, saandan a natrato a nasayaat ken saanen a nasurot ti ‘rule of law’ wenno paglintegan iti inaramid ti mayor ken dagiti konsehal a nagperma iti naputar nga ordinansa.
Innayon pay ni Cordero a ti daan a tiendaan ti pakakitaan no ania ti nagbanaganen ti ili ngem naminpinsan a pinukaw ti agdama nga administrasyon.
