VIGAN CITY- “Saan laeng a pakaidayawan ti pamilya Bersamin ti pannakadutok ni Chief Justice Lucas Bersamin no di ket iti intero nga Abra ken dagiti Ilokano ”, dayta ti inpaganetget ni dati a gobernador Eustaquio ‘Takit’ Bersamin a kabsat ni baro a Chief Justice Lucas Bersamin.
Ti exclusive interview ti Bombo Radyo Vigan kenni dati a gobernador Bersamin, kinunana a babaen iti pannakadutok ti kabsat na iti kangatuan a posisyon iti Korte Suprema ket manmanama a masukatanen ti impresyon ti kaaddwan a ti abra ket napanglaw ken nakabutbuteng a probinsya nangruna no eleksyon gapu iti nabara a laban iti pulitika ken presensya dagiti armado a grupo.
Patien pay ti dati a gobernador a makatulong ti kabsat na tapno magun-od ti hustisya dagiti taga abra a nagbalin a biktima ti krimen ken kinaranggas
Ita nga aldaw ket sarungkaran ti dati a gobernaodor ti tanem dagiti nagannak na tapno ipakaammo kadakuada ti ballaigi ti kabsat na ken agyaman gapu iti napintas a panangpadakkel da kadakuada.
