VIGAN CITY – Adda dagiti anggulo a mabalin a pangrugyan iti imbestigasyon ti Bantay municipal police station tapnu masolbar iti pannakapapatay ni Lydia Pingen Pespes nga agtawen ti uppat a pulo a taga- San Julian West, Bantay nga aglaklako iti ikan idiay tiyendaan ti San Vicente a pinaltugan da idi rabii ti Huwebes idiay Zone 4, Bantay.
Segun iti asawa ti biktima a ni Jun, adda iti nakasinnubang ti asawa na itay kallabes gapu iti utang ngem nai-blotter metten iti pulisya.
Malaksid iti dayta, adda pay iti nadakamat ni Jun a nairaman ti asawa na iti riri ti agassawa ta pagim-imunan ti maysa a babai ni Lydia.
Ti biyang met ti Bantay municipal police station nga idaulwan ni Police Lt. Christopher Bueno, addan iti person of interest da iti nasao a pammaltog a dimmalan payen iti paraffin test ket maiyur-uray laengen iti resulta na.
Segun ken ni Bueno, mapapati nga adda ti saan a nagkinnaawatan ti biktima ken ti nasao a person of interest ngem naurnos met laeng idi nagpatang da idiay San Vicente Police Station.
