VIGAN CITY – Dua iti kitkitaen nga anggulo dagiti otoridad iti napasamak a pammaltog idi naminsan a rabii idiay arko ti Barangay Cabaritan, Sto. Domingo a nakatayan dagiti aglive-in partner nga agpapautang.
Segun ken ni Police Captain Christopher Ramat, hepe ti Sto. Domingo municipal police station, idi napalabas a bulan ket nakasoan ti concubinage wennu pannakikamalala ken panaglabsing ti Republic Act 9262 wennu Anti- Violence Against Women and Their Children Act ni William Riputula Jr., nga agtawen iti uppat a pulo ket innem a taga- Paduchico, Sto. Domingo babaen ti asawa na a maysa nga OFW.
Gapu ti dayta, ti isyu a panagpautang ken ti kaso a naipila kontra ti biktima a ni William dagiti kitkitaen nga anggulo dagiti otoridad iti pannakapapatay na, pakairamanan ti live-in partner na a ni Lilian Umani a taga- Maas-asin, Magsingal ngem agnanaed idiay Barangay Paduchico.
Patta-pattaen da Ramat a ni laeng William iti tala a puntirya dagiti saan pay a nabigbig a suspek maibasar iti tallo a tama iti paltog iti bukot na ken maysa iti luppo ket nairaman laeng ni Lilian nga adda iti uneg ti tricycle a nagluganan da a nagsagaba iti dua a tama iti paltog iti akin-kannigid a takyag na a limsut iti barukong na.
