VIGAN CITY – Pinaltu-paltogan dagiti saan pay nabigbig a suspek iti pagtaengan ni Fredelito Torda nga agtawen ti lima pulo ket lima, naasawaan ken agnaed idiay Barangay Sagsagat, San Vicente idi rabii.
Agiparparking ni Torda iti motorsiklo na idi dimteng dagiti suspek a nagpaputok iti mamin-adu a daras iti pagtaengan da.
Agsipud iti dayta, nagkarayam nga immuneg iti pagtaengan da ti biktima idi nangnegna dagiti agsasaruno a putok ti paltog idinto a ti asawa na ket nagtalinaed iti sari-sari store da.
Idi napan kinita ti Bombo Radyo Vigan iti pagtaengan ti biktima, nabutawan iti sumagmamano a paset iti isim iti pagtaengan ken adda pay iti limsutan iti bala iti pader ti sari-sari store.
Dua pulo ket tallo a kapsula ti M16 ken metallic fragments iti naala dagiti pannakabagi ti linteg iti panagsukimat da iti pagtaengan ken aglawlaw na.
Ti agdama, manarimaan pay laeng iti imbestigasyon dagiti pannakabagi ti linteg inaig iti pasamak.
