VIGAN CITY – Plano a nayunan ti pwersa iti kapolisan iti ili ti Santiago kalpasan ti pannakapaltog ti maysa a barangay kapitan idiay Barangay Butol, Santiago, Ilocos Sur.
Iti pannaki-uman ti Bombo Radyo Vigan ken ni PCol. Darnel Dulnuan nga acting provincial director iti Ilocos Sur Provincial Police Office, nupay saanda nga ammo nu adda pakainaigan iti politika iti nasao a pammaltog ket masapul a masigurado iti kinatalged iti linak ken talna iti probinsia kasangwanan iti Barangay ken Sangguniang Kabataan Elections.
Patienna a ti target laeng iti pammaltog ket ni Barangay Captain Ruben Etrata Elefante, agtawen iti limapulo, naasawaan nga agnaed iti Barangay Gabao, Santiago, agdama nga ABC President ken agpaidasig kas Barangay Kagawad ita a Barangay ken Sangguniang Kabataan Elections ngem nairaman ti kaduana a putotna a ni Rubiemae Dampag Elefante nga agtawen iti duapulo a natamaan iti akin-kannigid a pungwa-pungwanna idinto a saan a naan-ano ti driver ti traysikel a naglugananda ta timmaray idi pinasardeng ida iti suspek.
Segun ken ni Dulnuan, bayat ti panaglugan dagiti agama iti traysikel nga agturong koma iti maysa a pasken ket kellaat a pinasardeng isuda ti saan a nabigbig a suspek a nakahelmet ket isun ti panangpaltogna iti biktima.
Inlawlawag met ti pamilia dagiti biktima nga awan iti aniaman a pangta ti biag ti kapitan iti agdama ta ti naudi a napadasannan a nakaawat ti pangta ket idi 2022.
Nupay kasta, agtultuloy iti imbestigasyon ket kitkitaendan dagiti CCTV footage a mabalin a makatulong iti panagsukimatda ket kiddawna kadagiti umili ti pannakitinnulongda para iti pannakasapul ti suspek a mapapati a 5’6 agingga 5’7 iti katayagna ken kalalaingan laeng iti bagbagina.
Kabayatanna, mapapati a caliber 38 a paltog iti inaramat ti suspek iti nasao a pammaltog.
VIDEO OF PCOL. DARNEL DULNUAN
