VIGAN CITY – Namnamaen ni Gov. Ryan Singson a babaen iti pannakaipatugaw ti baro nga Ilocos Sur Police Provincial Director a ni Pol. Col. Ronald Tagao ket nasaysayaat ti panagawid ditoy probinsia dagiti OFW wenno dagiti na-stranded nga estudiante nga isu ti kunana nga ipangrunada.
Segun ken ni Gov. Ryan Singson, pagyamananna ni Baguio City Mayor Benjamin Magalong gapu iti pannakitinnulongna a maiyawid ditoy probinsia dagiti estudiante idiay Baguio ngem kunana a simpaenda pay nga umuna dagiti checkpoint.
Malaksid iti dayta, pinasingkedanna a no man adda dagiti agsangpet a rumbeng iti panag-quarantine-da ket nakasagana metten dagiti quarantine facility ti probinsia a pagyananda.
No pay kasta, awan pay ti pinal a desisyon ti gobernador kalpasan iti taripnong idi kalman para iti pannakaipatungpal ti general community quarantine inton May 1 ta awan pay ti nalawag a pammilin iti national government.
