Ibilang nga ‘unconstitutional’ ti maysa a Constitutional Law Professor ti University of the Philippines ti addang ti Senado a maisubli iti Kongreso ti articles of impeachment ni Vice President Sara Duterte.
Iti pannaki-uman ti Bombo Radyo Vigan ken ni Paolo Tamase, saan a nalawag no ania ti nakaibasaran ti addang ta awan iti konstitusyon ken iti paglintegan ti Senado ti pannakaisubli ti impeachment iti kongreso.
Inlawlawag ni Tamase nga adda iti Senado ti turay nga isayangkat ti trial ken desisyonan, ta ti remand wenno ti panangisubli ti kaso ket saan laeng a pananglabsing iti paglintegan no di ket labsingenna pay ti structure ti konstitusyon gapu ta pagbalbalinenda a korte ti panangrepaso ti Senado kadagiti desisyon ti kamara.
Kunana a nasken a kitaen a nalaing dagiti senador ken miembro ti kongreso ti konstitusyon no mapasamak ti impeachment, ta saan a husto nga ipanamnama laeng iti Korte Suprema ti desisyon.
Patien ti nasao a law professor a no la ket koma masurot ti proseso ket saan a makaallilaw ken saan nga agresulta iti pannakaitantan ti impeachment.
Kayatda a makita ti impeachment kas accountability mechanism – maiparang dagiti ebidensya ken mangngegan dagiti testigo agsipud ta seryoso a patangan dagiti naipabasul iti bise presidente.
