VIGAN CITY – Maragsakan ti Officer in charge iti Santa National High School iti pannakaisubli ken pannakaipalubos ti limited face to face learning dagiti estudyante iti nasao a pagadalan.
Iti pannaki-uman ti Bombo Radyo Vigan kenni Francisco Arceo Jr., natungpalda amin a pagannurutan ti Department of Education tapno maisubli ti panagadal dagiti estudyante iti uneg ti classroom a dakkel a tulong kadagiti agadadal ken dagiti nagannak.
Addaan ti dua a grupo dagiti agad-adal a ti Group A ket sumrek iti aldaw ti Lunes, Mierkules ken Biernes idinto a ti Group B ket sumrekda iti aldaw ti Martes, Huebes ken agbaliw ti schedule-da tunggal lawas.
Innayon ni Arceo, bigat laeng iti panagserrek dagiti estudyante kas inrekomendar ti DepEd Ilocos Sur ta iti malem isu iti gundaway dagiti mangisursuro nga aramiden ken agsagana para iti kabigatan ti klaseda.
Impakammu met ni School Prinical II Juliet Aquino ti Santa Central School a nupay naaprubaranen ti limited face to face learning ket adda iti tallo nga agad-adal iti saan a pinalubosan dagiti nagannakda gapu iti agduduma a rason.
