VIGAN CITY – Nakemmeg ti maysa a lalaki idiay Brgy. Gabao, Santiago babaen iti pannakaiserbi ti search warrant nga imparuar ti Executive Judge ti Regional Trial Court Branch, Narvacan gapu ti panaglabsingna iti Republic Act 10591 wenno ti Illegal Possesion of Firearms and Ammunition Act.
Nabigbig ti suspek a ni Mark Christopher Espiritu, agtawen iti duapulo ket siam, mangngalap ken mekaniko nga agnaed iti nasao a lugar.
Iti pannaki-uman ti Bombo Radyo Vigan ken ni P/Lt. Rodel Ragasa, hepe ti Santiago Police Station, irwam ti suspek ti makiriri no mabartek ket nakarit gapu ta adda armasna a paltog a nairehistro iti apongna a lakay a ni Juan Etrata ken innem a tawenen nga expired ti lisensyana.
Idi isayangkatda ti operasyon, paglibakan ti suspek nga awan ti paltogna ngem bayat iti panangkita dagiti pannakabagi ti linteg ket nakaalada iti pagtaenganna ti maysa nga Armscor Caliber 45, maysa a magasin ti Caliber 45 ken duapulo ket dua a bala ti caliber 45.
Nakakustodiyan ti suspek iti Santiago Police Station pakairamanan dagiti naala kenkuana nga ebidensya tapno maidalan iti husto a proseso.
