Insingasing ni Bacolod Rep. Alfredo Abelardo Benitez ti 6 a bulan a pannakaisanud ti Barangay ken Sangguniang Kabataan elections tapno mailatang ti pondo para iti krisis iti presio ti gasolina.
Segun ken ni Benitez, ti P13 billion agingga P14 billion a nailatang para iti eleksion ket mabalin nga aramaten pay laeng a pangtulong kadagiti apektado a sektor.
Nakailanad iti gakat a naituding ti eleksion inton Nobiembre 2, ngem kasapulan ti baro a linteg no maisanud.
Bigbigen ti kongresista a mabalin a sumango ti gakat iti legal a karit gapu ta posible nga ideklara ti Korte Suprema a panaglabsing iti Konstitusion ti pannakaisanud manen ti eleksion uray no adda ‘just cause’-na.
Napagpatangan pay iti kamara dagiti addang a mangsulbar iti ngumin-ngina a presio ti gasolina, idinto nga impaganetget ni Benitez ti kasapulan a panangsagana iti nakaro a sitwasion gapu iti agtultuloy a riribuk iti Middle East.
