VIGAN CITY – Ninamnaman ni dati a Magdalo Partylist Representative Gary Alejano nga isanud ni Atty. Jude Sabio iti reklamo nga inpila na kontra ken ni Presidente Rodrigo Duterte idiay International Criminal Court inaig iti kampania iti gobierno kontra iti iligal a droga ken isyu inaig ti Davao Death Squad idi mayor pay laeng ti Davao City ni Duterte.
Ti pannaki-uman ti Bombo Radyo Vigan kenni Alejano, kinnan amin ni Sabio dagiti testimonya na idi gapu iti panangisanud na iti reklamo nga inpila na.
Nu pay kasta, mamati ti dati a kongresista a ti panangisanud ti nasao nga abogado iti reklamo na idiay ICC ket saan a maka-apekto iti pakabuklan ti kaso kontra iti presidente ta maysa laeng ni Sabio kadagiti adu a complainants.
Innayon na pay a biktima ni Sabio iti nakaro a pressure wennu panang-gipit iti gobiyerno ta iti kalkalabanen na ket ti presidente iti pagilian, karaman dagiti sabali pay a nangato nga opisyal iti gobiyerno.
Ti reklamo nga inpila ni Sabio ket agserbi laeng nga impormasyon ti ICC para iti isayangkat da a preliminary investigation isu nga uray nu isanud na ket awan met laeng iti serbi na agsipud ta saan met laeng a ti nasao nga abogado iti mabalin a pangalaan ti ICC iti impormasyon nu di ket adu pay dagiti tao ken wagas a mabalin a pangalaan ken aramaten da para iti bukod da nga imbestigasyon.
