VIGAN CITY – Nangiyulog iti resolusyon ti ili a Cabugao a mangidekdeklarar ti pannakaisakup iti critical zone ti intero a Sitio Lussong Suyo ti Brgy. Baclig; paset ti Serna St. ti Brgy. Quezon; ken paset ti Mabini St. ti Brgy. Bonifacio agingga inton May 30.
Dayta ket gapu ta adda ti sangapulo ket innem a positibo iti Antigen test ken dua iti RT PCR test idiay Sitio Lusong Suyo, Brgy. Baclig; tallo idiay Serna St. Brgy. Quezon; maysa iti RT PCR test ken maysa iti Antigen test iti Brgy. Bonifacio.
Nupay kasta, amin a residente nga adda iti critical zone ket maiparit a rumuar iti pagtaenganda; mabarikada dagiti lugar nga imanehar ti barangay babaen ti tulong ti PNP, BFP, ken MDRRMO.
Mangipaay ti LGU ti kasapulan dagiti residente ken bantayan ti Municipal Health Office ti kasasaadda.
