VIGAN CITY – Nakadepende iti agbalin a desisyon iti piskalya no double homicide wenno maingato a murder ti maipila a kaso kontra iti suspek ti pammagkong idiay Brgy. Bagani, Candon City.
Nabigbig ti suspek a ni Joe-nard Alcantara Manaog, agtawen ti duapulo a suspek iti pannakapapatay dagiti agama a da Danilo Apan Baesa, agtawen ti limapulo ket tallo ken ni Mark Quirantes Baesa nga agtawen ti duapulo ket tallo nga agpada nga agnaed iti nasao a lugar.
Inlawlawagna ni Atty. Roger Paz a no mapaneknekan a plinano ti suspek iti panangpapatayna kadagiti agama ket posible a mapilaan iti kaso a murder.
Kabayatanna, kinuna ni Barangay Captain Florencio Ramos iti Brgy. Bagani Campo a boluntaryo a simmuko ni Manaog idi kinemmeg dagiti barangay tanod kabayatan iti panagkamangna iti maysa a pagtaengan iti nasao a barangay kalpasan iti inaramidna a krimen.
