Mapaingetan ti pannakaipatungpal dagiti protocol iti uneg ti Ilocos Sur Provincial Jail tapno saan a maulit napasamak a pananggandat ti maysa a lalaki nga ilibas nga ited ti iligal a droga kadagiti person deprived of liberty babaen iti panangikabilna iti taraon.
Iti pannaki-uman ti Bombo Radyo Vigan ken ni Provincial Jail Warden Raymond Tabios, saan laeng a drug test no di ket thorough search ti maaramid iti uneg ti pagbaludan tapno masigurado nga awan dagiti maiserrek a kontrabando.
Masdaawda no kasano nga agam-ammo ti suspek a taga-Capangpangan, Vigan City ken dagiti saan a taga-Ilocos Sur a PDL a pinatulodanna iti iligal a droga ta saanna met a kabagyan.
Nagballaag ti nasao nga opisial kadagiti aggangandat a mangaramid iti kastoy a banag ta posible a maparigatan ti pamilia dagiti PDL a mangbisita kadakuada gapu iti naing-inget a pagannurotan iti uneg ti pagbaludan.
Maipalagip a nagturong iti engkwentro ti napasamak a panagresponde dagiti pannakabagi ti linteg iti suspek ta idi makadlaw nga adda mangsursurot kenkuana, nagpaputok kadagiti pannakabagi ti linteg isu a binalesda.
Nagsagaba ti suspek iti tama ti paltog iti bagina ken naipaagas iti ospital para iti pannakatamingna.
Naala ti tallo a piraso ti empty shell ti 9mm ken maysa a unit homemade caliber 38.
