VIGAN CITY- Saan a maikontra kadagiti napanglaw ken ubbing ti gakat tapno maipababa ti edad iti criminal liability— dayta ti inpaganetget ni Oriental Mindoro 1st District Rep. Salvador Leachon nga isu ti nangipila ti gakat tapno mapagbalin a syam ti tawen dagiti madusa gapu ti krimen a nakairamanan da manipud ti agdama a sangapulo ket lima.
Ti pannakiuman ti Bombo Radyo Vigan kenni Rep. Leachon, inlawlawag na a saan a maibalud dagiti ubbing a karaman iti krimen no di ket agtalinaed da iti Bahay Pag-Asa a maipatakder iti kada ili ken syudad ket maisakup da iti rehabilitation ken reformation program a tulbek iti napintas a masakbayan da.
Innayonna a dagiti kriminal a mangar-aramat ken mangab-abuso kadagiti ubbing ti madusa a ti kadagsenan a sentensya na ket reclusion perpetua wenno dwa pulo agingga uppat a pulo a tawen a pannakaibalud.
Kiniddaw ti agpanpanday linteg kadagiti kritiko a basaen da ti pakabuklan ti gakat tapno maawatan da a ti gagem na ket saan a madusa no di ket matarabay ken masalakniban dagiti ubbing.
