VIGAN CITY – Inlawlawag ni Governor Ryan Singson a ti Executive Order No. 45 ket maysa nga espesyal para kadagiti agbakasyon nga agindeg iti probinsia ita a paskua.
Iti pannaki-uman ti Bombo Radyo Vigan ken ni Gov. Ryan Singson, imbalakadna a nu man bilang nga adda manen iti mang-abuso ken mangundaway iti nasao nga EO ket saan nga agdudua a kanselarenna.
Inyunay-unayna kadagiti Barangay Officials ken Local Government Unit a nu adda manen iti mangabuso iti EO ket ipakaammoda nga insigida kenkuana tapno iti dayta nga aldaw ket ipakanselarna.
Ti nasao a banag ket kalpasan iti panaglabsing ti maysa a nagawid manipod Manila nga agnaed idiay Brgy. Bulala, Vigan ta idi nakasangpet iti probinsia ket nagpa-inom bayat iti panag-home quarantine-na.
Innayonna a dagiti nakapulapol ti nasao a residente ket naidalandan iti quarantine gapu iti kinarisgo nga impaayna ket pakaladingitanna ta rambakandan iti paskua iti uneg iti quarantine facility.
Kabayatanna, ti nasao a residente ket makasuan gapu iti panaglabsingna iti Executive Order nga inyetnag iti provincial government ken pagyamananna iti lokal a gobierno ti Vigan gapu iti insigida a panagtignayda inaig iti nasao nga isyu.
