VIGAN CITY – Nangiyulog ni Santa Mayor Jesus “Popoy” Bueno iti Executive Order No 44 a mangideklarar iti containment strategy iti paset ti Rizal, Santa nga ayan ti maysa a nainayon a kumpirmado a kaso ti Covid19.
Ti pagtaengan ti pasyente ken dagiti sangapulo ket uppat nga adda iti asidegna a balay ket maisakup iti Extreme Enhanced Community Quarantine wenno critical zone.
Dagiti met adda iti uneg ti 500-meter nga arubayan ti critical zone ket maisakup iti containment zone idinto a dagiti awan iti salinong ti critical ken containment zone ket maisakup iti buffer zone.
Maipalagip nga idi July 3 ket pito ti nainayon a kaso ti Covid19 iti nasao nga ili ken idi July 4 ket naisakup iti General Community Quarantine ti nasao nga ili nga agpatingga inton July 18.