Insingasing ti Department of Agriculture ken ni Presidente Ferdinand Marcos Jr a maingato ti taripa kadagiti imported a bagas ken temporaryo nga ipasardeng ti importasyon tapno masalwadan dagiti lokal a mannalon.
Segun ken ni Presidential Communications Office Secretary Dave Gomez, ti singasing ket pagpapatangan ti gabinete kadua ti presidente iti sidelines ti state visit-na idiay India.
Maipalagip a pinermaan ti presidente ti Executive Order No 62 idi June 2024 a mangituding iti 15 percent a taripa kadagiti imported a bagas manipud iti dati a 35 percent tapno mailaklaka ti presyo ti bagas iti pagilian.
Nakailanad pay iti pagannurotan a dumalan iti periodic review wenno kada uppat a bulan ti epekto ti 15 percent a taripa kadagiti imported a bagas.
