VIGAN CITY – Manamnama nga inton sumaruno a lawas pay laeng a maamuan no mailukat manen ti sektor ti turismo iti publiko ita a maidalanen iti modified general community quarantine ti probinsia.
Iti pannaki-uman ti Bombo Radyo Vigan ken ni Provincial Board Member Gina Cordero, maadal pay laeng no mabalinen a maisubli ti regta dagiti pagpasiaran iti probinsia ken matulongan dagiti negosyante a nalugi agsipud ta idi nalukatan iti publiko ti turismo ket bassit laeng dagiti bumisbisitan gapu ti amakda a makaptan ti Covid19.
Kabayatanna, pinasingkedan ni Cordero a kiniddawdan iti Department of Trade and Industry a mapautangan dagiti small and medium enterprises ken babaen iti tulong ti NSCC a mangimanehar ti pito a milion a pisos nga inlatang ni Gov. Ryan Singson ket maibangon ti nalugi a negosyoda.
Manipud iti innem a porsiento nga interest rate nga utangen dagiti negosyante ket agbalin laengen nga uppat a porsiento tapno saan unay a nadagsen kadakuada a bayadan.
