Sinuportaran ni Parañaque Rep. Gus Tambungin ti naisingasing a pannakaisardeng ti kapilitan a panagusar kadagiti purchase booklets para kadagiti agas ken groceries kadagiti senior citizens ken Persons With Disabilities (PWDs) tapno makaala iti discounts.
Immunan a pinasingkedan ni DSWD Secretary Rex Gatchalian ti suportada iti pannakaikkat dagiti booklet bayat ti pannakadengngeg ti funding proposal ti ahensia.
Adu a senior citizen ken PWD ti immasideg iti Kongresista nga uray no adda ID-da a mangpaneknek iti edad ken kasasaadda no awan ti booklet da ket saanda a maikkan ti discounts kadagiti botika ken grocery.
Segun iti Congressman, daanen ti nasao a sistema ken nayon laeng a mangparigat kadagiti senior citizens ken PWDs tapno makaalada iti nayon a benepisio, ken nasken nga ikkatenen ti panagusar ti medicine and grocery purchase booklet kadagiti PWD.
