VIGAN CITY- Political persecution iti pangibilangan ni Akbayan Partylist Rep. Tom Villarin iti pannakaidarum ken pannakakemmeg ni Maria Ressa a chief executive officer ti online news site a Rappler.
Ti pannaki-uman ti Bombo Radyo Vigan, kinuna ni Villarin a ti laban ni Ressa ket saan na a laban laeng wennu ti Rappler, ngem ketdi, laban pay ti nawaya a panagipadamag dagiti amin a kameng ti media.
Patien ti agpanpanday linteg a saan laeng a ti nasao a journalist ti mabalin a gipiten ti agdama nga administrasyon ngem ketdi posible nga uray dagiti sabali pay a media organization a mangkonkontra iti agdama nga administrasyon ni Presidente Rodrigo Duterte ket maisaruno da a makasoan.
Inkalintegan met ti agpanpanday linteg dagiti pada na nga oposisyon ket segun kenkuana, karbengan da ti agsao nu adda makita da a madi a mapaspasamak ditoy pagilian.
Kinunana, saan laeng a panangkontra ti administrasyon ti ar-aramiden da ngem ketdi adu met dagiti gakat nga induron da a para iti pagsayaatan iti kaaduan a kinanunungan ti administrasyon.
