VIGAN CITY – Impalubosen ti Regional Inter Agency Task Force ti pannakaidalan ti Modified Enhanced Community Quarantine iti ili ti Tagudin. Gapu kadagiti nagsasaruno a kaso ti Covid19 iti kallabes a resulta ti local transmission.
Nakailanad iti executive order nga imparuar ni Gov. Ryan Singson a masurot dagiti health protocols, pannakalimitar kadagiti residente a rumuar iti pagtaenganda, pannakaiparit a rumuar dagiti agtawen iti sasngapulo ket lima agpababa ken dagiti senior citizen pakairamanen dagiti nalaka a makaptan iti sakit.
Masapul nga adda work arrangement a suroten dagiti business establishment kas ti nababbaba a working schedule dagiti empleyado.
Maipalubos ti sports activities kas ti panag-jogging, panagtaray, panagbisikleta ken pannagna no la ket masurot a naimbag dagiti health protocols.
Malaksid ti dayta, agingga lima a tao laeng ti mabalin nga agkakadua kadagiti religious gathering idinto a ti transportasyon ket maipasardeng pay laeng ngem kasapulan a mangidiaya ti LGU ti point-to-point service kadagiti essential worker idinto a masurot ti curfew nga alas otso iti rabii agingga alas singko iti agsapa.
